2019-imi inuusuttunut ilinniarfiit

Saqqummersitami uani Kalaallit Nunaanni inuusuttunut ilinniarfinni ilinniartut kisimik sammineqarput. Kalaallit nunani allani inuusuttunut ilinniarfinni ilinniartut pillugit kisitsisitigut paasissutissat Naatsorsueqqissaartarfiup Kisitsisaataasiviani aaneqarsinnaapput.

 

2019-imi amerlanerulaartut inuusuttunut ilinniarfimmik naammassinnissimapput

2019-imi 711-t inuusuttunut ilinniarfimmik naammassinnissimapput. Ukiuni tulleriinni ilinniakkamik naammassinnittartut amerliartorusaarsimapput, 2016-imilu naammassinnissasut 803-ullutik amerlanerpaasimapput. Taamanili ukiumut nammassinnittartut amerlassussat 11,5 pct.-inik appariarsimavoq, kisiannili 2005-imiit 78 pct.-imik qaffassimalluni.

 

Titartagaq 1. 2005-imiit 2019-imut inuusuttunut ilinniarfimmik naammassinnissimasut

Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNISC11D).

 

Ilinniarnertuunngorniarnermik naammassinnittarnerit amerlassusaat ukiup siulianisulli annertutigipput. 2019-imi ilinniarnertuunngorniarnermik naammassinnissimasut 283-iusut, ukiup siuliani 273-iusipput. 2005-imut sanilliullugu ilinniarnertuunngorniarnermik naammassinnittarnerit amerlassusaat marloriaatinngorsimavoq.

 

Inuussutissarsiornermik ilinniarfinni nammassinnittarnerit amerlassusaat 428-mut amerleriarsimapput, ukiup siuliani 395-iusimasut; qaffariaat 8 pct.-imiilluni. Taakkunannga 54-it niuernermik ilinniakkami MERX I-imi soraarummeerlutik naammassinnissimapput, ilinniarnertuunngorniarnermik naammassinnissimasunut niuernerullu iluani ilinniakkamik toqqaasimasunut ilinniagaq ukiup affaanik sivisussusilik.

Ilinniakkamik pineqartumik aallartitsisimasut inuusuttunut ilinniakkamik naammassinnissimareersuupput, taamaattumillu innuttaasut ilinniagaqarsimassusaannut tamanna sunniuteqanngilaq.

 

Inuusuttunut ilinniarfinni ilinniakkanik ingerlatsisut amerlassusaat nikinngillat

2019-imi Kalaallit Nunaanni ilinniakkamik ingerlatsisut 2108-nik amerlatigupput, 2018-imilu ilinniartut amerlaqqatigaat. Inuusuttunut – aamma inuussutissarsiornermik ilinniakkani ilinniartut 2 pct.-inik annikitsumik appariarsimapput. 2011-miilli ilinniartut 345-nik ikileriarsimapput, tamanna 14 pct.-inik annertussuseqarpoq. Ilinniarnertuunngorniarfinni ilinniartut inuussutissarsiornermillu ilinniarfinni ilinniartut amerlaqqatigiinginnangajapput.

 

Inuussutissarsiornermi ilinniakkanik aallartitsisartut ikinnerusut, ilinniarnertuunngorniarnernik aallartitsisartut amerlanerupput

2018-imi inuusuttunut ilinniarfinni ilinniakkanik aallartitsisut 1.217-iupput[1], tamanna 2016-imut sanilliullugu 2 pct.-inik appariarneruvoq, tassani inuussutissarsiornermi ilinniakkanik aallartitsisimasut amerlanerpaasimammata. Ilinniartuunngorniarnernik aallartitsisimasut 2014-imi amerlanerpaasipput, inuussutissarsiornermi ilinniakkamik aallartitsisimasut 2016-imi amerlanerpaasut.

 

Agguaqatigiissillugu 20-nik ukiullit ilinniarnertuunngorniarnermik aallartitsisarput, inuussutissarsiornermilu ilinniakkamik aallartitsisartut agguaqatigiissillugu 27-nik ukioqartarlutik.

 

Titartagaq 2. 2005-imiit 2019-imut Kalaallit Nunaanni ilinniakkanik aallartitsinerit

Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNISC11A).